WARARKA BARAAWEPOST Khamiis 24 july 2008

Sheekh Shariif oo sheegay in kooxda Asmara ee uu madaxda u yahay Xasan Dahir ay doonayaan inay shacabka Soomaaliyeed dagaal ku sii hayaan.

Guddoomiyaha guddiga fulinta ee isnaheysiga dib u xoreynta soomaaliya Sheekh Shariif Sheekh Axmed ayaa ku eedeeyay Kooxda Asmara ku sugan ee uu horseedka u yahay Sheekh  Xasan Daahir in ay doonayaan inay shacabka Soomaaliyeed ku sii hoggaamiyaan dagaal kale oo daba dheeraa,halka garabka uu isagu hoggaamiyona ay doonayaan inay  ka shaqeeyaan sidii uusan dagaal dambe uga dhicin dalka islamarkaana loo bad baadin lahaa dadka  iyo dalka soomaaliyeed inta ka harsan.

Sheekh shariif ayaa carrabka ku dhuftay in Siyaasaddoodu ay tahay inay Itoobiyaanku wada hadal ku baxaan oo ruux dambe oo Soomaaliyeed uusan dagaal ku dhiman, halka garabka uu hoggaamiyo Sheekh  Xasan Daahir Wweysna ay ku haminayaan dagaal dalka kasii socda taasina aanay maslaxadda umada Soomaaliyeed ku jirin.

Sheekha ayaa qiray in Itoobiyaanku aysan dalka iska imaan balse la keenay,ayaguna ay wadaan qorshe ay kula xaajoonayaan  dadkii iyaga keenay si kadib loo meel mariyo hadafka ah in ay Soomaaliya ka baxaan ciidamada Itoobiyaanku . Sheekha ayaa intii uu hadlay mar walba carrabku ku adkeynayay oo ku celcelinayay in ay ka go’an tahay dalkan in dagaal dambe laga bad baadiyo.

Sheekh Shariif ayaa sidoo kale xusay in diinta Islaamku ay qabto hadii naf la badbaadin karo in la bad baadiyo,taasina ay tahay siyaasadda uu haatan garabaka uu horkacayo ay ku shaqeynayaan.

Sheekh shariif ayaa ugu dambeyntii ugu baaqay Sheekh Xasan Daahir Aweys iyo 29-ka xubnood ee la jooga magaalada Asmara in ay u naxaan shacabka Soomaaliyeed isla markaana ay soo raacaan halka danta ummaddu ku jirto.

Guudoomiyaha isbaheysiga dib u xoreynta soomaaliyeed Sheekh Shariif ayaa sidoo kale sheegay maaddama Itoobiyaanku ay wada hadal ku baxayaan in aanay jirin sabab xabbad loo rido oo dad kale oo Soomaaliyeed loo sii laayo iyagana ay taas qaateen meel marin doonaana isla markaana ay walaalahooda Asmara ku sugan sababata ay xabbada ugu dheggan  ay tahay in dagaalka uu sii socdo islamar ahaantaana ay qorshahaas ka dambeeyso xukuumadda Eriterea oo khilaafka kala dhaxeeya Itoobiya ay kaga faa'iideysaneyso khilaafka mas'uuliyiinta isbaheysiga Asmara.

Sheekha ayaa sidoo kale yiri dhiigga Soomaaliyeed hala badbaadiyo munkar ma ahan ee waa macruuf isla markaana uusan khilaafka cusub ee soo kala dhex galay isbaheysiga wax saameyn ah ku yeelan doonin dadaalada nabadeed ee ka socda dalka iyo dibada, wuxuuna tilmaamay in garabka Asmara ku haray ay u muuqdaan kuwo ka soo horjeedo xal laga gaaro dalka Somalia iyo degganaantiisa.

Sheekha oo ka hadlay xil ka qaadistii ay ku sameeyeen soddonka xubnood ee ka tirsan isbaheysiga ee ku haray Magaalada Asmara ayaa sheegay ineysan jirin sabab xilka looga qaado iyadoo aan loo soo marin wadadii loogu talagalay,isla markaana sababta xil ka qaadistaas aan jirin loogu dhawaaqay ay tahay heshiiska Jabuuti  maxaad u saxiixday oo aad nabad u oggolaatay.

Dadwewyne fara badan oo maanta ka qaybgalay aaska marxuum Cabdalla Nuuradiin.

Allaha u naxariistee marxuum cabdalla Nuuraddiin oo shalay maqribnimadii ku geeriyoodey xaafadda Shibis ee magaalada Muqdisho ayaa waxaa maanta meydkiisa lagu aasay qabuuraha Sheekh Cali Cabdulle oo ku yaala Duleedka waqooyi  ee Magaalada Muqdisho waxaana aaska marxuumka ka qayb galay kumanaan ruux oo ka mid ah dadweynaha ku dhaqan magaalada Muqdisho.

Marxuum cabdalla Nuuraddiin oo ahaa fanaan iyo jilaa  caan ahaa oo soo mara dalka soomaaliya ayaa sidoo kale wuxuu ahaa weriye iyo xiriiriye barnaamij oo caan ah isla markaana ay dadku aad u jeclaayeen inay dhageystaan barnaamijyada uu tebin jiray.

Marxuumka ayaa horey uga soo shaqeeyay hey’adihii warbaahinta dalka ee xiligii berisamaada siiba Idaacadii radio Muqdisho, wargeysyadii Qaran, Mogadishu Times, iyo sidoo kale Idaacadda Horn Afrik iyo Cabital Voice.

Maamulka iyo  dhamaan aqristeyaasha shabakadda warbaahinta ee Baraawepost ayaa waxay tacsi u dirayaan qoyskii ehaladii iyo qaraabadii uu ka Geeriyooday Marxuum Al-Ustaad Cabdalla Nuuradiin Axmed, waxeyna Ilaahay uga baryayaan inuu janadii Fardowso ka waraabiyo eheladii uu ka geeriyoodey iyo dhamaan shacabka soomaaliyeed ee uu ka tagayna uu samir iyo iimaan ka siiyo Aamiin Aamiin

Dagaal culus oo saakay waaberigii ka qarxay magaalada Beledweyn.

Dagaal culus oo u dhexeeya ciidamada Itoobiya iyo kooxaha ka soo horjeeda joogitaankooda ayaa saakay waaberigii ka qarxay gudaha magaalada Beledweyne. Dagaalkaan yaa yimid kadib markii xalay saqdii dhexe ay ciidamada Itoobiyaanku gudaha u galeen magaalada Beledweyne iyagoo fariisimo ka samaystay saldhigga magaalada iyo labada buundo ee isku xirta magaalada.

Dadweyne fara badan ayaa saaka bilaabay in ay ka barakacaan magaalada Balad weyn kuwaasoo u sii cararay goobo ka baxsan halkaasi iyagoo ka ka baxsanaya madaafiicda ku soo dhaceysa xaafadahaasi. Lama hayo illaa iyo haatan warar faahfaahsan oo ku sabsan qasaaraha dagaalku inta uu leegyahay

Ciidamadii DFKMG ee shalay soo gaaray Muqdisho oo isla shalay dagaal lagala horyimid iyo Fadhigii Qaramada Midoobey ee shalay oo looga hadlay arrimaha Somalia

 Dagaal xooggan ayaa shalay galab ku qabsaday qeybo ka mid ah Magaalada Muqdisho ee ciidamada DFKMG ee dhowaan tababarka mkun soo dhamaystay Itoobiya kuwaasoo shalay ay qeyb ka mid ahi soo gaareen magaalada Magaalada Muqdisho.

Dagaalkan ayaa sida ay sheegayaan ku bilowday kadib markii kooxaha ka soo horjeeda dowladda FKMG Soomaaliya ay weerareen ciidamadaas cusub kadib markii ay ciidamadaasu ka bilaabeen qeybo ka mid ah waddada warshadaha howlgalo ay ku beegsanayaan goobo looga shaki qabo in ay joogaan Kooxaha ka soo horjeeda dowladda FKMG Soomaaliya.

Dhanka kale shir ay shalay isugu yimaadeen xubnaha ku jira golaha ammaanka ee qaramada midoobey ayaa Golaha ayaa xalay oo dhan looga hadlayey xaaladaha Soomaaliya.Fadhigan ayaa waxaa goobjoogeyaal ka ahaa laba wafdi oo ka kala socday dowladda FKMG iyo kooxaha mucaaradka.

Sida ay sheegayaan wararaka aanu ka heleyno Newyork Golaha amaanka ayaa isku raacay in taageero dhaqaale iyo mid Militeri oo isugu jirta qalab ciidan iyo tababaro dhanka ciidamada ah loo fidiyo dawladda Soomaaliya iyo in la cambaareeyo cid walba oo ka soo horjeeda heshiiskii dhowaan lagu saxiixey Magaalada Jabuuti ,ayadoo loo saaray gudi madax banaan oo ka soo baaraan daga talaabooyin laga qaado ciddii ku xadgudubta heshiiskaas  .

Arrinta ku saabasan codsigii uu golaha u gudbiyay wasiirka arrimaha dibadda ee DFKMG ee ku saabsanaa in ciidamo loo soo diro Soomaaliya ayaa xubnaha golaha amaanka ee Qaramada Midowbay ku balameen in layskugu soo laabto Bisha soo socota 25-keeda ,waxaana arintaasi loo saaray gudi ka kooban 5 xubnood oo ka baaraan daga soona qiimeeya xaalada Soomaaliya & waxyaabaha ay ciidamadaasi qabanayaan ee la xiriira dhinaca howlgallada

Axmed Xuseen (Jeesto) iyo Cusmaan Amerika. Baraawepost  Muqdisho iyo Marka.Somalia