Dagaalo ka dhacay koonfurta Gaalkacayo

Abaarihii 10kii subaxnimo ee saakay ayaa waxaa uu dagaal dhexmaray maleeshiyo beeleedyo wada dega degmada Gaalkacayo ee xarunta gobolka Mudug kuwaasoo rasaas xooggan isku weydaarsaday dhinaca koonfueed ee magaalada Gaalkacyo.

Wararka  ayaa waxay intaa ku darayaan in iska horimaadkaasi uu salka ku hayo muran dhul oo daba dheeraaday kaasoo markii danbena gaaray in laysu adeegsado maleeshiyo beeleedyo, iyadoo khasaaraha dagaalka ka dhashay ay isugu jiraan dhimashada illlaa iyo afar ruux oo ah maleeshiyada dagaaladu ay dhexmareen iyo dhaawaca dad rayid ah kuwaasoo la gaarsiiyaay cisbitaalka magaalada Gaalkacyo.

Guud ahaan waxaa haatan deggan xaaladda degmada Gaalakcayo waloow ay saakay hakad galeen isu socodka gaadiidka haatanse ay dadaalo wadaan odayaasha dhaqanka sidii loo qaboojin lahaa xiisaddaasi.

Dadka ku dhaqan degmada Xamarweyn oo ka cabanaya ciidamo xiran dareeska ciidamada

Waxaa isa soo taraya qaylo dhaan xooggan oo ka soo yeeraysa dadka ku dhaqan degmooyinka xamarweyne iyo xamar jajab ee Gobolka Banaadir  kuwaasoo sheegay in labadii maalmood ee ugu danbeeysay halkaasi la soo daadiyay ciidamo xiran dareeska ciidanka DFKMG ee soomaaliya si ay wax uga qabtaan aminga.

Ciidamadaasi qaarkood ayaa geeysta dhac oo ay dadka ka qaataan wixii agab ah oo ay sitaan iyo isgaarsiinta gacanta lagu qaato ee loo yaqaan Mobilada.             

Maxamed Nuur Diini oo ah xoghayaha degmada xamar weyn oo ay la xiriirtay warbaahinta ayaa sheegay in ciidamada halkaasi la keenay ay dhibaato xooggan ku hayaan marmarna ay ridaan rasaas aanan loo meel dayin oo ay ku ridaan meelaha ay dadku ku badan yihiin, waxaana gabgagabdii uu codsaday xogayaha maamulka degmadaasdi in madaxa sare ee DFKMG ee soomaaliya ay wax ka qabtaan dhibaatooyinkaasi ku soo kordhay maalmihii ugu danbeeyay labadaasi degmo.