Duqeymo culus oo maanta lala beegsaday qaybo ka mid ah gobolka Banaadir

Degmooyinka kaaraan , shibis iyo yaaqshiid oo ka mid ah gobolka Banaadir ayaa waxaa lala beegsaday duqeeymo culus kuwaasoo ka imanayaya dhanka  ciidamada AMISOM iyo kuwa DFKMG  ee soomaaliya.

Duqeymahaasi ayaa inta ogyahay waxaa ku naf waayay illaa yo shan ruux waxaana dhaawac soogaaray dadka badan illaa iyo tobaneeyo sida ay sheegeen wadayaasha gawaarida gurmadka ee ay ku deeqeen shirkadaha isgaarsiinta.

Goobihii ay duqeymahaasi ka dhaceen ayaa galabta deggan iyadoo horey ay xaafadahaasi uga barakaceen inta badan dadkii deggana waxaana ku harsan oo keliya dad yar oo faro ku tiris ah kuwaasoo ilaalo ka haya guryahooda.

Duqeymahan maanta dhacay ayaa sida loo sheegayo waxaa loogu tala galay in dhufeysayada loogaga saaro kooxaha kasoo horjeeda dowladda waxaana wararku sheegayaan in xoogagga xarakada alshabaab ay gebi ahaan faaruqiyeen goobihii ay kaga sugnaayeen waqooyiga Muqdisho.

Degaano ka tirsan Gobolka Bakool oo ay maanta soo gaareen ciidamo isugu jira Itoobiyaan iyo Soomaali

Ciidamada  Itoobiyaan ooay wehliyaan gawaarida uraalka ee kuwa dagaalka iyo ciidamo soomaali ah oo taageersan DFKMG ayaa maanta gudaha u galay Gobolka Bakool, gaar ahaan Degmada Ceel Barde oo ay fariisimo ka sameysteen.

Wararka laga helayo isgaarsiinta nooca loo yaqaan [radio taarka] ayaa sheegaya in ciidamada Itoobiyaanka ay ka soo gudbeen xadka, kuwaasoo ay la socdaan saraakiil, waxaana ay durba dhaq dhaqaaqyo ay ka bilaabeen degmada Ceel Barde.

Waxaa muuqata in Ciidamadan itoobiyaanka ahi ay xoojin u yihiin Ciidamada DFKMG ee soomaliya ee duulaanka ku soo ah Gobolada Bay iyo Bakool, hase ahaatee saraakiisha Ciidamada Dowladda ee goboladaas ayaa beeniyay in ay wehliyaan Ciidamo Itoobiyaan ah.

Guud ahaan waxaa hakad galay isu socodka gaadiidka iyo ganacsiga iyadoo cabsi laga qabo in dagaalo culus ay dhacaan.